Bylting í heyskap

Bændur á Suðurlandi eru sumir farnir að ráða verktaka í heyskapinn. Mikill sparnaður, segir bóndinn á Heiði í Biskupstungum.

Svo gæti farið að hvítu heybaggarúllurnar sem liggja víða um tún landsins hyrfu á næstu árum - að minnsta kosti ef verktakar á borð við þá Sigurð Ágústsson í Birtingaholti og Davíð Ingvason fá að ráða. Í vor stofnuðu þeir fyrirtæki, fjárfestu í stórvirkum vélum, meðal annars svokölluðum múgsaxa sem saxar nýslegið grasið, blæs því upp í vagna og þaðan er þeim ekið í flatgryfjur. Í stað þess að rúlla grasinu öllu upp í dýrt rúllubaggaplastið er því sturtað ofan á svart plast, síðan er þjappað og þegar slætti lýkur er plastinu lokað og net lagt yfir. Einn sem fréttastofa ræddi við í dag - segir þetta byltingu fyrir bændur.

Áður voru menn að slá 2-3 hektara á klukkutímann, segir Davíð, en í dag eru þeir að slá upp undir tíu á tímann. Davíð segir þetta borga sig fyrir bændur. Og bóndinn á Heiði er hjartanlega sammála því að þetta borgi sig fyrir hann. Áður tók það hann viku að heyja 30 hektara, nú tekur það tíu tíma.