Billups nær samningum við Detroit

ESPN sjónvarpsstöðin greinir frá því í nótt að leikstjórnandinn Chauncey Billups hafi náð samkomulagi við Detroit Pistons um að framlengja samning sinn við félagið um 5-6 ár og fái fyrir það 60 milljónir dollara. Umboðsmaður Billups hafði áður vísað svipuðum fréttum á bug.

Billups er þrítugur stjörnuleikmaður og var valinn verðmætasti leikmaður lokaúrslitanna árið 2004 þegar Detroit landaði titlinum. Hann var með 17 stig og 7,2 stoðsendingar að meðaltali í leik á síðasta tímabili, en var ekki með sjálfum sér í úrslitakeppninni í vor.