Vilja hætta við hækkun stýrivaxta

Hagfræðingar hafa áhyggjur af því að hagvöxtur muni minnka á heimsvísu í kjölfar samdráttar á bandarískum fasteignalánamarkaði sem hefur valdið usla á alþjóðlegum hlutabréfamarkaði. Gangi það eftir mun fjármögnun verða erfiðari en áður. Bloomberg segir að evrópski seðlabankinn verði að falla frá hækkun stýrivaxta í næsta mánuði.

Jean-Claude Trichet, bankastjóri evrópska seðlabankans, sagði í byrjun mánaðar að bankinn hefði í hyggju að hækka stýrivexti um 25 punkta til að draga úr verðbólgu á evrusvæðinu. Gangi það eftir fara stýrivextir í 4,25 prósent.

Fréttaveitan Bloomberg segir mun skynsamlegra að halda stýrivöxtum óbreyttum í stað þess að gera fyrirtækjum erfiðara um vik með dýrara lánsfé.

Bloomberg hefur eftir sérfræðingum á sviði fjármála að óróleiki sé í loftinu og vara þeir við því að fyrirtæki geti lent í vandræðum með fjármögnun sína. Gangi verstu spár eftir megi því reikna með auknum fjölda gjaldþrota í Evrópu.

Nokkur fjöldi fjármálafyrirtækja hefur glímt við lausafjárskorts vegna samdráttar á bandarískum fasteignalánamarkaði, ekki síst í Bandaríkjunum. Í gær greini fjármálafyrirtækið Countrywide Financial Corporation frá því að það hefði þurft að nýta sér lán upp á 11,5 milljarða bandaríkjadala, jafnvirði um 800 milljarða íslenskra króna, vegna lausafjárskorts. Að sögu er hins vegar er að segja af ástralska fjármálafyrirtækinu Rams Home Loans Group, sem mistóks að endurfjármagna lán sitt og var því að leita annarra leiða til að finna lausn sinna mála.