Líkur á óbreyttum stýrivöxtum í Evrópu

Vaxtaákvörðunardagur er hjá Englandsbanka í Bretlandi og evrópska seðlabankanum í dag. Greinendur gera fastlega ráð fyrir því að vextir verði óbreyttir í skugga hræringa á fjármálamörkuðum. Seðlabankinn hér á landi, í Brasilíu, Kanada og Ástralíu hafa allir haldið stýrivöxtum óbreyttum. Líkur eru hins vegar á stýrivaxtalækkun í Bandaríkjunum.

Greinendur höfðu margir hverjir reiknað með að evrópski seðlabankinn myndi hækka stýrivexti um 25 punkta og færa þá í 4,25 prósent í dag. En í skugga óróleika á fjármálamörkuðum í kjölfar mikillar vanskilaaukningar á annars flokks fasteignalánum í Bandaríkjunum á vordögum og hættu á lausafjárskorti fjármálafyrirtækja víða um heim séu meiri líkur en minni að bankinn ákveði að setja hækkun á salt að sinni,, að sögn breska ríkisútvarpsins. Á sama tíma hefur hins vegar dregið úr verðbólgu á evrusvæðinu og mældist hún 1,8 prósent í júlí samanborið við 1,9 prósent í mánuðinum á undan.