Countrywide í fjárhagshremmingum

Gengi hlutabréfa í fjármálafyrirtækinu Countrywide Financials, einu stærsta fasteignalánafyrirtæki Bandaríkjanna, féll um fimm prósent á hlutabréfamarkaði í Bandaríkjunum í dag. Ástæðan er frétt bandaríska dagblaðsins New York Post þess efnis að fyrirtækið glími við afar slæma stöðu og sé að undirbúa sölu á hlutabréfum til að bæta eiginfjárstöðu fyrirtækisins.

Dagblaðið segir, að staða Countrywide sé afar slæm og sé fyrirtækið á vonarvöl vegna lausafjárskorts í kjölfar mikilla vanskila hjá viðskiptavinum fyrirtækisins, sem margir hverjir eru með litla greiðslugetu.

Þá segir blaðið ennfremur að hlutafjáraukning fyrirtækisins sé í höndum Goldman Sachs, stærsta fjárfestingabanka landsins, og stórrar lögfræðiskrifstofu. Engar tölur hafa verið nefndar en vitnað er til þess að Bank of America hafi í síðasta mánuði keypt sig inn í bankann fyrir tvo milljarða dala, jafnvirði 130 milljarða íslenskra króna.

Fyrirtækið stendur þessa dagana í umfangsmikilli hagræðingu og reiknar með að segja upp allt að tólf þúsund manns, fimmtungi af starfsliði sínu.