Rannsaka innherjasvik í Carnegie

Efnahagsbrotadeild sænsku lögreglunnar hefur einn starfsmann sænska fjárfestingabankans Carnegie í haldi vegna innherjasvika. Sænska blaðið Dagbladet segir hrinu innherjasvika í landinu beinast að litlum hópi manna í sænsku fjármálalífi. Innhverjasvikin hafa komið harkalega niður á gengi bréfa í bankanum.

Dagbladet segir fjölda svikamála sem þessara hafa skekið sænskt fjármálalíf á árinu en margt bendi til að hinir grunuðu séu kunningjar, útskrifaðir úr einum og sama viðskiptaháskólanum í Stokkhólmi.

Blaðið segir sömuleiðis að sænska ríkisstjórnin hafi fram á það við stjórnendur Carnegie að þeir gefi skýringar á því hvernig starfsmenn bankans hafi höndlað með 630 milljónir sænskra króna, jafnvirði sex milljarða íslenskra króna, á síðastliðnum tveimur árum. Þetta jafngildir hagnaði af verðbréfaviðskiptum sem skrifast á þrjá verðbréfamiðlara á vegum Carnegie á síðustu tveimur árum og varð til þess að hagnaður bankans var 227 milljónum sænskra króna hærri en efni stóðu til.

Rannsókn lögreglunnar og svikamálin hafa komið illa við Carnegie en gengi bankans hefur fallið úr 160 sænskum krónum á hlut í 120 krónur síðan í febrúar á þessu ári.

Landsbankinn átti 20 prósenta hlut í Carnegie en seldi hann í fyrravor.