Komdu til Ítalíu, Jose

Framherjinn Hernan Crespo hjá Inter Milan hefur skorað á fyrrum stjóra sinn Jose Mourinho að koma til Ítalíu og gerast þar þjálfari. Crespo spilaði fyrir Mourinho þegar hann lék með Chelsea.

"Mourinho er skrautlegur maður og það væri mjög spennandi að fá hann tíl Ítalíu. Ég veit að honum líkar Ítalía vel og því held ég hann myndi finna sig vel í ítalska boltanum. Ég veit bara ekki hvaða liði hann ætti að taka við. Ég kann vel við Mourinho bæði sem mann og stjóra og mér finnst ítalski boltinn þurfa á frábærum þjálfurum eins og honum að halda. Einu sinni var Ítalía vagga knattspyrnunnar en það er ekki svo í dag," sagði Argentínumaðurinn.

Inter mætir Roma í A-deildinni um helgina og þar ætti að vera á ferðinni einn af leikjum ársins á Ítalíu. Crespo skoraði 15 mörk fyrir Inter á síðustu leiktíð eftir að hafa verið hjá erkifjendunum í AC Milan þar á undan.