Afkoma Bakkavarar undir spám

Hagnaður Bakkavarar nam 11,3 milljónum punda, jafnvirði 1,4 milljarða króna, samanborið við 15,2 milljónir punda á sama tíma í fyrra. Þetta er nokkru undir spám greiningardeilda viðskiptabankanna sem reiknaðist til að hagnaðurinn myndi nema á bilinu 12 til 14 milljónir punda.

Rekstrarhagnaður félagsins nam 39,7 milljónum punda, jafnvirði fimm milljörðum króna, sem er tveimur prósentum minna en á sama tíma í fyrra.

Velta nam hins vegar 375,7 milljónum punda, jafnvirði 47,2 milljörðum króna, sem er 13 prósenta aukning frá þriðja ársfjórðungi í fyrra.

Þá nam hagnaður hluthafa 11,3 milljónum punda á tímabilinu, sem er fjórðungi lægra en í fyrra.

Eiginfjárhlutfall nam 19,4 prósentum samanborið við 18,2 prósent við árslok og nam arðsemi eigin fjár 19,2 prósentum á tímabilinu. Á sama tímabili í fyrra nam arðsemin hins vegar 28,2 prósentum.

Ágúst Guðmundsson, forstjóri Bakkavarar, segir í tilkynningu frá félaginu, að félagið standi frammi fyrir mjög krefjandi aðstæðum þar sem verð á hráefni hafi haft veruleg áhrif á matvælaframleiðslu. „Þetta kemur skýrt fram í afkomu og sölu félagsins á fyrstu níu mánuðum ársins. Langtímahorfur Bakkavör Group eru góðar - eftirspurn eftir ferskum tilbúnum matvælum er sífellt að aukast út um allan heim og er félagið vel í stakk búið til að nýta þau tækifæri sem felast í þeirri þróun," segir hann.

Uppgjör Bakkavarar