Krónan styrkist mikið á einum mánuði

Gengi krónunnar hefur hækkað töluvert gagnvart öðrum gjaldmiðlum undanfarinn mánuð. Gengi krónunnar gagnvart evru, Bandaríkjadal og sterlingspundi hefur til að mynda hækkað í kringum þrjár krónur.

Evran kostaði tæplega 87 krónur og 70 aurar 1. október, samkvæmt miðgengi Seðlabankans, en var við lok dags í dag rúmlega 84 krónur og 90 aurar.

Sterlingspundið kostaði tæplega 125 krónur og 80 aura fyrir mánuði, en 122 og 20 aura í dag.

Gengi Bandaríkjadals hefur líka lækkað mikið gagnvart krónunni, var ríflega 61,6 fyrir mánuði, en tæplega 58 krónur og 80 aura í dag. Gengi svissneska frankans hefur lækkað um rúmar tvær krónur, var 52,8 fyrir mánuði en 50,6 í dag.

Á sama tíma hafa minni breytingar orðið á gengi dönsku krónunnar og japanska jensins gagnvart íslensku krónunni.