Macy's spáir minni einkaneyslu

Gengi hlutabréfa tók að lækka skyndilega í Bandaríkjunum í gær eftir að bandaríska verslanakeðjan Macy's skilaði inn uppgjörstölum sínum fyrir þriðja ársfjórðung. Verslunin skilaði 33 milljóna dala hagnaði, sem jafngildir tæpum tveimur milljörðum íslenskra króna, á tímabilinu. Þetta er á pari við væntingar markaðsaðila.

Þrátt fyrir talsverðan viðsnúning frá þriggja milljóna dala tapi á sama tíma í fyrra telja stjórnendur verslunarinnar að horfur í efnahagslífinu séu verri nú en áður, muni einkaneysla dragast saman og gerði nú ráð fyrir minni vexti í smásöluverslun.

Gengi hlutabréfa í Macy's féll við þetta um 7,1 prósent, eða 2,18 dali á hlut. Á eftir fylgdi gengi annarra verslanakeðja vestanhafs, svo sem í Target, Sears og fleirum en það fór niður að meðaltali um rúm fjögur prósent.

Samhliða þessu birti bandaríska viðskiptaráðuneytið tölur um vöxt í smásöluverslun. Verslun jókst um 0,2 prósent á milli mánaða í síðasta mánuði, sem var 0,1 prósentustigi undir spám og þykja í lægri kantinum.