Jól án Madeleine eins og hver annar dagur

Kate og Gerry McCann hafa ekki gert nein plön fyrir jólin, þrátt fyrir fréttir af því að þau hafi keypt gjafir fyrir Madeleine. Hjónin sögðu Sky fréttastofunni að jólin yrðu eins og hver annar dagur án Madeleine og fókus þeirra sé á að finna stúlkuna.

Dagblöð í Bretlandi hafa skýrt frá því að hjónin muni hafa pakka fyrir Madeleine undir jólatrénu í þeirri von að hún verði heima til að taka þá upp um jólin.

Talsmaður fjölskyldunnar Clarence Mitchell vísaði fréttunum á bug sem “tilfinningaþvælu.” Hann sagði að þau myndu tala um jólin þegar rétti tíminn væri fyrir það.

Mitchell sagði að fjölskyldan lifi dag frá degi sem hver væri líkur öðrum. “Ef Madeleine verður enn týnd um jólin verður það vissulega erfiður tími fyrir þau.”

The Sunday People hafði eftir afa Madeleine, Brian Healy, að fjölskyldan væri viss um að stúlkan væri á lífi og væri enn að vonast eftir kraftaverki svo hún gæti verið með þeim.