Dómarar viðurkenndu mistökin og Haukar hafa kært

Eftirlitsdómari og annar dómara leiks Fram og Hauka í úrslitum deildabikarkeppninnar hafa viðurkennt að eitt mark Fram var tvískráð í fyrri hálfleik liðanna í gær.

Fram vann á endanum leikinn, 30-28, þrátt fyrir að hafa skorað aðeins 29 mörk í leiknum. Mistökin áttu sér stað snemma í leiknum og má áætla að gangur leiksins hefði verið öðruvísi ef rétt staða í leiknum hefði verið uppgefin.

Aron Kristjánsson, framkvæmdarstjóri Hauka og þjálfari liðsins, hefur staðfest við Vísi að Haukar hafi kært úrslit leiksins.

Guðjón L. Sigurðsson er formaður dómaranefndar HSÍ og sagði að bæði Ólafur Haraldsson, eftirlitsdómari á leiknum, og annar dómara leiksins hafi hringt í sig í gærkvöldi og sagt frá mistökunum.

„Ólafur fór svo aftur í morgun og skoðaði þetta betur. Hann fann villu í skráningu sinni á mörkum fyrri hálfleiks. Þegar Fram skoraði mark í stöðunni 4-4 fór staðan upp í 6-4 en ekki 5-4."

„Eftir leikinn bar hann sína skráningu saman við skráningu ritara og tímavörðs og bar þeim saman. Það var einhver vafi á lofti um þetta en þeir gátu ekki fundið úr því á þeim tíma. Þetta er auðvitað algjört klúður."

Dómstóll HSÍ mun væntanlega koma saman strax á nýju ári og taka málið fyrir. Haukar munu skila sinni greinagerð og Guðjón á von á því að starfsmenn leiksins verði kallaðir fyrir.

„Ég geri ekki ráð fyrir öðru en að þeir staðfesti það sem áður hefur verið sagt."

Guðjón segir að vitanlega sé um mikið áfall að ræða.

„Þetta er alveg skelfilegt áfall. Þetta er eitt af því sem getur komið upp en á ekki að koma upp. Það er ekkert við því að segja eða gera. Menn verða bara að bíta í þetta súra epli."

Aron sagði í samtali við Vísi að nú væri ekkert annað að gera en að bíða og sjá hvað HSÍ gerir í málinu.

„Ég sé samt enga aðra leið en að spila leikinn aftur. Það er ekki hægt að láta úrslitin standa svona enda framkvæmd leiksins ónýt."