Grohl með Prodigy

Dave Grohl, forsprakki Foo Fighters, spilar á trommur í laginu Run With Wolves á nýrri plötu Prodigy, Invaders Must Die. Grohl gerði garðinn frægan sem trommari Nirvana og eftir að sú sveit hætti hefur hann verið duglegur við að taka í kjuðana með öðrum sveitum. Má þar nefna Queens of the Stone Age og Probot.

„David sendi mér tölvupóst og spurði hvort hann mætti senda mér efni. Hann sendi mér stóran bunka af trommuslætti sem veitti okkur mikinn innblástur," sagði Liam Howlet úr Prodigy. „Við gerðum ennþá meira saman og netið hjálpaði okkur að gera þetta allt saman að veruleika." Platan er væntanleg í mars á næsta ári.