Góð uppgjör keyrðu hlutabréfin upp

Gott uppgjör bandaríska netleitarrisans Google og sæmilegt uppgjör Citigroup, stærsta banka Bandaríkjanna, ollu hækkanahrinu á bandarískum hlutabréfamarkaði í dag. Fjárfestar telja að í uppgjörunum endurspeglist að nú sjái fyrir endann á lausafjárkrísunni.

Hagnaður Google jókst um 30 prósent á fyrsta ársfjórðungi sem var þvert á spár en Citigroup afskrifaði helmingi upphæð úr efnahagsreikningi sínum en á síðasta fjórðungi í fyrra. Afskriftir á skuldabréfavafningum sem tengjast bandarískum undirmálslánum og af öðrum fjárfestingum námu 5,1 milljarði dala, jafnvirði tæpra 388 milljarða íslenskra króna. Afskriftir á síðasta ársfjórðungi í fyrra námu tíu milljörðum dala.

Gengi hlutabréfa í Citigroup hækkaði um 4,5 prósent innan veggja fjármálahverfisins Wall Street í New York í dag en bréf Google ruku upp um rúm 20 prósent.

Vikan var almennt ágæt, að mati fjármálasérfræðinga í samtali við fréttastofu Associated Press. Vitna þeir til þess að uppgjör Coke-Cola, íhlutarisans Intel og bandaríska fjárfestingarbankans JP Morgan, sem birt voru í vikunni, hafi öll verið yfir væntingum.

Dow Jones-hlutabréfavísitalan hækkaði um 1,81 prósent en Nasdaq-vísitalan, sem samanstendur af skráðum fyrirtækjum í tæknigeiranum, hækkaði um heil 2,61 prósent. Þá hækkaði S&P 500-vísitalan, sem samanstendur af 500 stærstu fyrirtækjum Bandaríkjanna, um 1,81 prósent.