Kvennalið Aftureldingar og Fjölnis sameinuð

Afturelding og Fjölnir hafa sent frá sér tilkynningu þess efnis að félögin munu tefla fram sameiginlegu liði í úrvalsdeild kvenna á næstu leiktíð. Í samningi sem gildir í eitt ár er einnig að sendur verður sameiginlegur 2. flokkur kvenna til leiks.

Guðrún Jóna Kristjánsdóttir er aðalþjálfari hins sameinaða liðs. Heimaleikir þess munu bæði verða leiknir á Fjölnisvelli í Grafarvogi og á Varmárvelli í Mosfellsbæ

Afturelding endaði í 6. sæti úrvalsdeildarinnar síðasta sumar en lið Fjölnis í 10. sæti og féll því í 1. deild.

Fréttatilkynningin :

Afturelding og Fjölnir hafa náð samkomulagi um að tefla fram sameiginlegu liði í Landsbankadeild kvenna næsta sumar undir nafninu Afturelding / Fjölnir. Samstarfið er til eins árs í senn og nær til meistara- og 2 flokka félagana. Mikill metnaður er hjá báðum félögum að senda öflugt lið til keppni næsta ár sem mun ekki gefa öðrum liðum neitt eftir í keppni um titla. Til þess hafa liðin ákveðið að nýta hið geysilega öfluga þjálfarateymi Aftureldingar, sem mun leggja höfuð áherslu á að þroska og bæta þann góða efnivið sem félögin búa yfir í dag.

Eitt af megin markmiðum félagana er að hagræða í rekstri þar sem miklir óvissutímar eru framundan í efnahagsmálum þjóðarinnar og því betra að hafa vaðið fyrir neðan sig. Því mun félagið ekki sækja leikmenn til að styrkja liðið með gylliboðum sem ekki verður hægt að standa við. Eflaust munu fleiri leikmenn koma til liðsins fyrir komandi keppnistímabil, en það verður á þeim forsendum að viðkomandi leikmenn vilja bæta sig knattspyrnulega í einni bestu umgjörð í kvennaknattspyrnu í dag.

Auk fjárhagslegs hagræðis og öflugs þjálfarateymis þá sjá félögin sér hag í stækkun og styrkingu leikmannahópsins. Gert er ráð fyrir að heimaleikir verði leiknir bæði á Fjölnisvelli og Varmárvelli í Mosfellsbæ. Ekki hefur verið tekin ákvörðun um búninga.