Van der Sar með á morgun

Markvörðurinn Edwin van der Sar hefur jafnað sig af meiðslunum sem héldu honum frá leik Manchester United gegn Blackburn um síðustu helgi. Hann verður því í markinu í fyrri leiknum gegn Barcelona í Meistaradeildinni annað kvöld.

Wayne Roone, Owen Hargreaves og Anderson eru allir í leikmannahópnum hjá United en þeir hafa glímt við minniháttar meiðsli. Þá eru Gary Neville og Darren Fletcher einnig í hópnum.

Portúgalinn Deco hefur ekki leikið með Barcelona í þessum mánuði en hann er til í slaginn á morgun. Thierry Henry gat hinsvegar ekki tekið þátt í æfingu í gær.

Ronaldinho, Lilian Thuram og Edmilson tóku heldur ekki þátt í æfingunni. Fyrirliðinn Carles Puoyl verður ekki með á morgun þar sem hann tekur út leikbann og er því reiknað með að Rafael Marquez og Gabriel Milito verði í hjarta varnarinnar.