Margrét Lára skoraði 150. markið í kvöld

Margrét Lára Viðarsdóttir, leikmaður Vals, var að vonum sátt í kvöld eftir að lið hennar lagði KR 2-1 í stórleiknum í Landsbankadeild kvenna.

„Þetta var bara barátta út í gegn eins og alltaf hjá Val og KR en mér fannst við vera betri aðilinn heilt yfir. Við erum rosalega samheldnar og hungrið er enn til staðar þó svo að við höfum unnið Íslandsmeistaratitilinn síðustu tvö ár. Það skiptir okkur engu máli og viljum meira, en þetta er langt mót og það er ekkert gefið í þessu. Við eigum Breiðablik á sunnudaginn og það er hörkulið og við verðum að vera tilbúnar í þann leik eins og í dag," sagði Margrét Lára sem var að skora sitt 150. mark í efstu deild í kvöld.

„Það er alltaf gaman að skora og framherjar þrífast náttúrulega á því en ég er auðvitað fyrst og fremst ánægð með sigurinn," sagði Margrét Lára.