Fasteignalánarisi í kreppu

Viðskiptum með hlutabréf í bandaríska fasteignalánafyrirtækinu Countrywide Financial, einu stærsta fyrirtæki Bandaríkjanna í þessu geira, voru stöðvuð til skamms tíma í dag eftir gengi bréfanna féll um rúm sautján prósent á hlutabréfamarkaði í Bandaríkjunum í kjölfar orðróms að félagið ætlaði að fara fram á greiðslustöðvun.

Stjórnendur fasteignalánafélagsins sendu frá sér tilkynningu þess efnis skömmu síðar að ekkert lægi til grundvallar orðróminum og væri fjarri því að fyrirtækið væri á leið í þrot.

Gengi bréfa í Countrywide hefur hríðlækkað eftir að vanskil á undirmálslánamarkaði beit í afkomu fjármálafyrirtækja og fasteignamarkaðurinn í Bandaríkjunum kólnað. Hæst stóð gengið í rúmum 45 dölum á hlut en hefur hríðlækkað frá síðasta ári og fór lægst í 5,76 dali á hlut í dag. Countrywide hefur verið harðlega gagnrýnt fyrir útlánastefnu sína á undirmálslánamarkaði og er starfsemi þess til rannsóknar vestanhafs. Gengið jafnaði sig lítillega eftir að tilkynning fyrirtækisins birtist í dag.

Countrywide tapaði 1,2 milljörðum bandaríkjadala, jafnvirði tæpra 70 milljarða króna, á þriðja ársfjórðungi í fyrra. Stjórnendur fyrirtækisins segja stefnt að því að skila hagnaði á síðasta fjórðungi nýliðins árs. Markaðsaðilar draga hins vegar í efa að af því verði.