Bank of America til bjargar Countrywide

Viðræður eru langt komnar um kaup Bank of America, eins af stærstu bönkum Bandaríkjanna, á Countrywide, stærsta fasteignalánafyrirtæki landsins. Countrywide hefur beðið afhroð í lausafjárkrísunni sem skekið hefur fjármálaheiminn upp á síðkastið og gengi þess fallið um heil 89 prósent.

Útlánastefna fyrirtækisins hefur verið harðlega gagnrýnd eftir því sem lausafjárþurrðin í kjölfar mikilla vanskila á bandarískum fasteignamarkaði hefur bitið fastar í afkomu banka og fjármálafyrirtækja og hefur rekstur fyrirtækisins verið til rannsóknar.

Gengi Countrywide, sem í vikunni var sagt eiga á hættu að verða gjaldþrota, rauk upp um rúm 60 prósent þegar best lét í dag eftir að bandaríska viðskiptadagblaðið Wall Street Journal birti frétt um viðræðurnar í dag. Fjárfestar hafa tekið viðræðunum vel vestanhafs og hefur það smitað út frá sér í almennri hækkun á hlutabréfamarkaði.