Frekari afskriftum spáð hjá Merrill Lynch

Bandaríski fjárfestingabankinn Merrill Lynch gæti hugsanlega neyðst til að afskrifta hátt í 15 milljarða bandaríkjadala, jafnvirði rúmra 940 milljarða íslenskra króna, vegna tapa á fasteignalánum fyrirtækisins, samkvæmt heimildum bandaríska dagblaðsins New York Times. Gangi það eftir eru afskriftirnar talsvert meiri en áður hafði verið reiknað með.

Bloomberg-fréttaveitan, sem vitnar til dagblaðsins, segir markaðsaðila hafa áður reiknað með að bankinn gæti þurft að afskrifa 12 milljarða dala á fjórða ársfjórðungi til viðbótar við þá 8,4 milljarða sem varð að strika úr bókum bankans á þriðja ársfjórðungi. Afskriftirnar urðu til þess að Stan O'Neal, forstjóri bankans, var látinn taka poka sinn og hverfa úr forstjórastólnum líkt og forstjórar nokkurra annarra banka og fjármálastofnana í Bandaríkjunum sem hafa komið illa út úr lausafjárkreppunni. John Thain, forstjóri bandarísku-evrópsku kauphallarinnar NYSE-Euronext, tók við starfi hans í enda síðasta árs.

Samtals námu afskriftir stærstu banka Bandaríkjanna um 100 milljörðum dala, jafnvirði rúmra 1.000 milljarða íslenskra króna. Almennt er talið að afskriftirnar verði nokkru minni á síðasta fjórðungi ársins. Það liggur þó enn ekki ljóst fyrir en reiknað er með að endanlegar niðurstöður liggi fyrir þegar bankar í Bandaríkjunum skila inn uppgjörum sínum í næstu viku.