Við núllið í Bandaríkjunum

Helstu hlutabréfavísitölur leituðu jafnvægis í átt til núllsins eftir stökk uppá við í upphafi viðskiptadagsins í kjölfar þess að auðkýfingurinn Warren Buffett, einn af ríkustu mönnum heims, bauðst til að baktryggja nokkur af stærstu skuldatryggingafyrirtækjum Bandaríkjanna.

Fyrirtækin sem Buffett hefur boðist til að koma til hjálpar með þessum hætti eru Ambac Financial Group, MBIA og Financial Guaranty Insurance Co., sem öll hafa farið illa út úr undirmálslánakrísunni. Lánshæfiseinkunnir þeirra hafa verið lækkaðar sem gerir þeim erfitt um vik að sinna viðskiptum sínum og afla nýrra.

Samkvæmt fréttum Associated Press-fréttastofunnar í dag hafi eitt fyrirtækjanna afþakkað boð hans og hafi hann enn ekki heyrt frá tveimur. Buffett neitað að greina frá því hvaða fyrirtæki hann vísaði til.

Associated Press segir marga hafa reiknað með að Buffett myndi koma skuldatryggingafyrirtækjunum til hjálpar með einum eða öðrum hætti.

Fréttin um aðstoð Buffetts hafði mikil áhrif á hlutabréfamarkaði bæði í Bandaríkjunum og Evrópu í dag, þar á meðal hér á landi en Úrvalsvísitalan hækkaði í enda dags um 3,24 prósent, sem jafnframt er fyrsta dagslokahækkun hennar í hálfan mánuð.

Gengi bréfa í bönkum og fjármálafyrirtækjum hækkaði nokkuð vestra, líkt og hér á landi.

Þá hækkaði FTSE-vísitalan í Bretlandi um rúm þrjú prósent. Sömu sögu er að segja um hlutabréfavísitölur í Frakklandi og Þýskalandi.

Vísitölur í Bandaríkjunum ruku upp eins og fyrr sagði en leituðu niður á við eftir því sem á leið. Dow Jones-hlutabréfavísitalan hækkaði í dagslok vestra um 1,1 prósent en Nasdaq-vísitalan, sem hafði lækkað á tímabili, jafnaði sig á endanum og stóð á núlli í enda viðskiptadagsins.