Stjórn Glitnis hefur sent frá sér yfirlýsingu vegna umfjöllunar í Markaðnum í gær og í morgun þess efnis að breytingar séu fyrirhugaðar á stjórn bankans og að orðrómur sé um að Lárus Welding, forstjóri, standi upp fyrir nýjum manni.
Í yfirlýsingu stjórnar Glitnis segir eftirfarandi:
„Vegna umfjöllunar Markaðarins í gær og morgun vill stjórn Glitnis koma eftirfarandi á framfæri. Stjórnin lýsir yfir fullum stuðningi við forstjóra félagsins, Lárus Welding, og vísar orðrómi um breytingar á stöðu hans á bug. Jafnframt lýsir stjórnin yfir ánægju sinni með þau störf sem forstjórinn og aðrir stjórnendur bankans hafa innt af hendi síðan breytingar voru gerðar á yfirstjórn hans vorið 2007.
Fyrir hönd stjórnar,
Þorsteinn M. Jónsson, formaður
Jón Sigurðsson, varaformaður"
