NBA í nótt: New Orleans vann Boston

New Orleans minnti rækilega á sig í nótt er liðið vann góðan sigur á Boston, 113-106, þrátt fyrir að hafa lent fimmtán stigum undir snemma í leiknum.

Boston var nýbúið að ganga frá öllum liðunum í Texas á útivelli - Dallas, Houston og San Antonio - en varð að játa sig sigraða fyrir New Orleans á útivelli í nótt.

Boston var með þægilega forystu allt fram í þriðja leikhluta. Í þeim fjórða virtust leikmenn liðsins einfaldlega orðnir þreyttir og varamenn New Orleans gengu á lagið. Sérstaklega voru þeir Jennero Pargo Bonzi Wells vel en sá síðarnefndi var með tólf stig og átta stolna bolta. Boston skoraði aðeins sautján stig í fjórða leikhluta.

Pargo var með fimmtán stig og sex stoðsendingar en stigahæstur var David West með 37 stig. Chris Paul lék í aðeins 29 mínútur vegna villuvandræða en skoraði samt nítján stig.

Paul Pierce var stigahæstur hjá Boston með 28 stig en Rajon Rondo kom næstur með 23 stig.

Phoenix vann Houston, 122-113, þar sem Amare Stoudemire skoraði 38 stig. Shaquille O'Neal átti einnig góðan leik og skoraði 23 stig auk þess sem hann tók þrettán fráköst, rétt eins og Stoudemire.

Phoenix náði sautján stiga forystu strax í fyrsta leikhluta og létu hana aldrei af hendi. Tracy McGrady var stigahæstur leikmanna Houston með 30 stig og Luis Scola kom næstur með sextán stig.

Houston hefur nú tapað þremur af síðustu fjórum leikjum sínum eftir sigurgönguna löngu.

Utah vann Seattle, 115-101. Carlos Boozer var með 26 stig og fráköst en Mehmet Okur skoraði 24 stig, þar af nítján í seinni hálfleik, auk þess sem hann tók tíu fráköst.

Philadelphia vann New Jersey, 91-87. Andre Iguodala skoraði 28 stig, þar af tíu í fjórða leikhluta en New Jersey hafði sjö stiga forystu í upphafi lokaleikhlutans. Samuel Dalbert var með ellefu stig, átján fráköst og fimm varin skot.

Atlanta vann Orlando, 98-90, og hafði þar með áttunda sætið af New Jersey í Austurdeildinni um stundarsakir að minnsta kosti. Joe Johnson skoraði 34 stig og Mike Bibby 20.

Charlotte vann Miami, 94-82. Gerald Wallace skoraði 26 stig og Jason Richardson 24 í fyrsta sigri liðsins í síðustu sex leikjum þess. Miami er sem fyrr með versta árangurinn í NBA-deildinni og hefur nú tapað þremur í röð.

Memphis vann Sacramento, 117-111. Rudy Gay var með 24 stig og sjö fráköst en Juan Carlos Navarro skoraði helming sinna 22 stiga í fjórða leikhluta.

Minnesota vann New York, 114-93. Ryan Gomes skoraði 26 stig og varamaðurinn Rashad McCants bætti við 24 stigum. Meðal þeirra sem voru fjarverandi hja´New York voru Zach Randolph, Nate Robinson, Stephon Marbury og Eddy Curry.

Indiana vann Chicago, 108-101. Mike Dunleavy skoraði 25 stig og Troy Murphy bætti við 24 stigum.

Milwaukee vann Cleveland, 108-98, og batt þar með enda á sex leikja taphrinu liðsins. Mo Williams var með 29 stig fyrir Milwaukee sem og LeBron James hjá Cleveland.

Portland vann LA Clippers, 83-72. Joel Przybilla skoraði 24 stig auk þess sem hann tók 25 fráköst sem er persónulegt met hjá honum. Brandon Roy skoraði 23 stig.

Staðan í deildinni

Úrslitakeppnin eins og hún lítur út í dag