Bush ver björgun húsnæðislánasjóðanna

Húsnæðislánasjóðirnir Fannie Mae og Freddie Mac eru nægilega fjármagnaðir. Þetta sagði George W. Bush, forseti Bandríkjanna, á blaðamannafundi sem nú stendur yfir í Hvíta húsinu. Hann vísaði því á bug að ákvörðun ríkisstjórnarinnar að auka hlutafé sjóðanna í skugga mikilla afskrifta vegna þrenginga á fasteignamarkaði sé til þess fallið að bjarga hluthöfum sjóðanna.

Gengi hlutabréfa í báðum sjóðum hefur fallið um tæp þrjátíu prósent í dag eftir að frá því var greint að þeir glímdu við lausafjárskort. Þá sagði bandaríski fjárfestingarbankinn Goldman Sachs í gær að staða sjóðanna væri mjög slæm. Líklegt sé að gengi hlutabréfa í þeim geti fallið um allt að 35 prósent á næstunni og var mælt með því að fjárfestar losuðu sig við bréf sín í þeim.

Fannie Mae og Freddie Mac njóta stuðnings bandaríska ríkisins og sækja fé í ríkiskassann sem sjóðirnir svo lána áfram.

Bush sagði stöðuna erfiða en sjóðirnir væru styrkir. Ekki kæmi til greina að hækka skatta til að mæta þeim vanda sem steðji að bandarísku efnahagslífi um þessar mundir. „Það væru mistök," sagði George W. Bush.