Freyr: Pottþétt lélegasti fyrri hálfleikur okkar í sumar

„Þessi leikur var mikil vonbrigði. Ég er mjög svekktur með hvernig stelpurnar mættu til leiks gegn góðu liði Þórs/KA og þetta var pottþétt lélegasti fyrri hálfleikur sem ég hef séð mitt lið spila í sumar.

Við náðum að vísu að laga okkar leik í síðari hálfleik og hefðum átt að klára þetta en það gekk því miður ekki eftir.

Sigurmarkið hjá þeim kom svo eins og vatnsgusa framan í okkur þar sem þetta var í raun eina færið þeirra í síðari hálfleik.

Nú þurfum við að halda einbeitingu og klára okkar leiki," sagði Freyr Alexandersson þjálfari Vals.

Valsstúlkur voru afar óánægðar með að fyrra mark Þórs/KA hefði fengið að standa en Freyr vildi ekki kenna því um hvernig fór.

„Það var vissulega rangstöðufnykur af fyrra markinu en það þýðir ekkert að hugsa um það. Dómararnir gerðu sitt besta og það er bara okkur sjálfum að kenna hvernig fór," sagði Freyr.