De Rossi neitar því að vera á leiðinni til Arsenal

Ítalski landsliðsmaðurinn Daniele De Rossi hjá Roma hefur verið orðaður við mörg af stærstu félögum Evrópu í sumar eins og Real Madrid og Barcelona og nú nýlega Arsenal.

Miðjumaðurinn segir þó ekkert vera til í sögusögnunum og ítrekar að hann ætli að vera áfram í Rómarborg.

„Ég hef bara séð þetta með Arsenal í blöðunum en það er ekkert í gangi þar. Ég er líka mjög ánægður hjá Roma og félagið hefur alltaf komið vel fram við mig og ég sé því enga ástæðu til þess að færa mig um set. Ég vill bara Roma," segir De Rossi í viðtali við Gazzetta dello Sport.