Gattuso framlengir til 2012

Gennaro Gattuso hefur framlengt samning sinn við ítalska úrvalsdeildarfélagið AC Milan til loka tímabilsins 2012.

Gattuso hefur verið orðaður við nokkur félög á Englandi að undanförnu en svo virðist sem að hann verði um kyrrt á Ítalíu.

Hann hefur minna fengið að spila með Milan en hann hefði kosið sjálfur en hann vill ólmur vinna sér sæti í ítalska landsliðinu fyrir HM næsta sumar.

Gattuso hefur átt við meiðsli að stríða af og til undanfarin tvö ár og munu forráðamenn AC Milan hafa lofað honum því að hann fengi meira að spila þegar hann kæmist aftur í gott form.