Gattuso lýkur ferlinum hjá Milan

Umboðsmaður Gennaro Gattuso segir að leikmaðurinn muni ljúka ferlinum sínum hjá AC Milan. Gattuso samdi við félagið í gær til loka tímabilsins 2012.

Gattuso hefur ekki fengið að spila jafn mikið og hann hefði sjálfur kosið að undanförnu og hótaði hann því að yfirgefa félagið í síðasta mánuði. Hann var til að mynda orðaður við Manchester City.

Umboðsmaðurinn sagði við ítalska fjölmiðla að hann hafi átt gagnlegan fund með Adriano Galliani, framkvæmdarstjóra AC Milan. Niðurstaða fundarins hafi verið sú að Gattuso hefði enn mikið fram að færa til félagsins og hann hefði því ákveðið að vera um kyrrt og taka meira að segja á sig launalækkun.

Gattuso kom til AC Milan árið 1999 eftir að hafa verið á mála hjá Perugia, Salenitana og Rangers.