Sigurður Ragnar Eyjólfsson, landsliðsþjálfari kvenna í fótbolta var meðal áhorfenda í Grindavík í fyrrakvöld þegar Laufey Ólafsdóttir snéri aftur í boltann eftir tæplega fjögurra ára fjarveru.
Sigurður Ragnar er þessa daganna að leggja lokahöndina á að velja 22 manna landsliðshóp fyrir EM en hann getur ekki valið Laufeyju þrátt fyrir að hafa hrifist af innkomu hennar í gær.
„Laufey kemur ekki til greina í lokakeppnishópinn því við erum búin að skila inn 40 manna lista til UEFA. Ég má bara velja leikmenn sem eru á þeim lista," segir Sigurður og bætir við:
„Hún kemur því ekki til greina í EM-hópinn en ef hún heldur áfram að æfa fótbolta þá kemur hún að sjálfsögðu til greina í landsliðshópinn eins og allir aðrir leikmenn," segir Sigurður Ragnar.
Laufey kom inn á 64. mínútu, skoraði tvö mörk og fiskaði eitt víti á þeim 26 mínútum sem hún spilaði.
„Mér fannst hún eiga mjög góða innkomu í þennan leik og hún er frábær leikmaður. Vonandi heldur hún áfram sem lengst í fótbolta," segir Sigurður Ragnar.
„Hún virkaði ekki mjög ryðguð og maður sá strax hvað hún er með góðan leikskilning og góð hlaup. Hún spilar boltanum vel frá sér og það er mikið spil í kringum hana. Ég hef oft séð hana spila í gegnum tíðina og hún er frábær leikmaður," segir landsliðsþjálfarinn.
Það er nóg að gera hjá kvennalandsliðinu í haust því undankeppni HM tekur strax við af EM.
„Það eru landsleikir í sepetember og október og ef hún er að spila út tímabilið og er að spila vel þá veit maður aldrei. Ég veit heldur ekki hvað Laufey ætlar sér, hvort hún ætlar að sprikla eitthvað til gamans í sumar eða hvort hún ætli að taka þetta á fullri alvöru og ætli sér að spila fótbolta áfram," segir Sigurður Ragnar sem fagnar endurkomu þessarar snjöllu knattspyrnukonu.
„Hún hefur átt við erfið meiðsli að stríða en hún hefur ekki fundið fyrir þeim undanfarnar vikur sem er mjög jákvætt," sagði Sigurður Ragnar að lokum.
