Mourinho: Við erum bestir

Portúgalinn Jose Mourinho, þjálfari Inter, er afar bjartsýnn á að hans lið muni verja ítalska meistaratitilinn á þessari leiktíð.

Inter er þegar komið með þægilegt forskot í ítölsku deildinni og þó svo Mourinho geri ráð fyrir harðri baráttu reiknar hann ekki með neinu öðru en að sitt lið fari alla leið.

„Það verður ekki auðvelt að vinna deildina en við höfum nú þegar sýnt að við erum besta liðið á Ítalíu," sagði Mourinho brattur.

Helsta breytingin á liði Inter milli ára var sú að liðið missti Zlatan til Barcelona.

„Við getum aldrei gleymt Ibrahimovic sem gerði mikið svo við gætum unnið leiki. Félagið stóð sig samt vel í því að fá Milito og Eto´o til félagsins. Þeir hafa staðið sig vel," sagði Portúgalinn.