Ólafi verður ekki snúið

Ólafur Stefánsson segist ekki ætla að endurskoða þá ákvörðun sína að taka ársfrí frá landsliðinu þó svo landsliðið sé í miklum vandræðum vegna meiðsla lykilmanna þessa dagana og eigi erfiða leiki í mánuðinum.

„Ég mun ekki spila. Ég hef einu sinni verið plataður til þess að koma aftur þegar ég tók mér frí og það var ekki góð reynsla," sagði Ólafur við Vísi.

„Ég lét plata mig til Túnis 2005 og hausinn á mér var þá búinn að segja að ég ætti ekki að vera þar og þá fylgdi líkaminn bara með. Ég var ekki í neinu standi á því móti. Það var versta móti sem ég hef spilað með landsliðinu.

„Ég ætla að læra af því og einnig að standa við mín orð. Ég sagðist ætla að fara í frí í eitt ár og sjá svo til. Það stendur enn," sagði Ólafur sem vonast þó að sjálfsögðu til þess að strákarnir standi sig vel og komist til Austurríkis næsta janúar.

„Þeir eru í góðum málum og þurfa að vinna annan heimaleikinn. Þá eru þeir í fínum málum," sagði Ólafur og bætti við.

„Það má vel vera að eitthvað af þessum meiddu leikmönnum séu leikfærir ef þeir bíta á jaxlinn. Ég veit ekki hversu alvarleg staðan er hjá þeim öllum. Þeir verða líka að spyrja sjálfa sig að því hverju þeir séu til í að fórna," sagði Ólafur Stefánsson.