KK með endurvöktum Sextett

Stórviðburður í íslensku poppi á sér stað í Fríkirkjunni á föstudagskvöldið þegar Sextett Ólafs Gauks kemur saman á ný. Tónleikarnir eru hluti af Vetrarhátíð Reykjavíkurborgar. „Við erum búin að vera í alltof langri pásu," segir Svanhildur Jakobsdóttir. Auk hennar eru Ólafur Gaukur og Karl Möller upprunalegir meðlimir í endurvakta bandinu, en lögin eru þau sömu, ógleymanlegir poppsmellir eins og „Segðu ekki nei", „Þú ert minn súkkulaðiís" og „Undarlegt með unga menn", sem Rúnar Gunnarsson söng. Hann féll frá árið 1972 en KK kemur í staðinn.

„Ólafur Gaukur hringdi í mig og spurði hvort ég vildi taka eitt gigg með Sextettinum. Auðvitað sagði ég já og þurfti ekki einu sinni að gá í bókina. Ég hefði slaufað flestu fyrir þetta," segir KK sem segir mikla upphefð í að syngja með Sextettinum. „Maður er svo orðinn svo vanur þessari músík að maður pælir ekkert í henni. Svo þegar maður kryfur hana er það bara vá! Það er svo mikið að ske. Ólafur Gaukur útsetti fyrir ýmsa fleiri og maður heyrir strax ef hann var að verki."

Hæst reis frægðarsól Sextettsins þegar Ríkissjónvarpið sýndi þættina Hér gala Gaukar, sem gerðu Svanhildi og Rúnar landsþekkt á árunum 1968-69. „Það var verið að spara svo mikið að það var tekið yfir alla þættina nema einn," segir Svanhildur. „Þar fóru heimildir forgörðum."

- drg