Pepsi-deild kvenna: Jafnt hjá Val og KR

Valur gerði jafntefli við KR í Vesturbænum í kvöld í Pepsi-deild kvenna. Valsstúlkur eru enn á toppi deildarinnar er fjórir leikir fóru fram í kvöld.

Markalaust var í hálfleik í öllum fjórum leikjunum.

Hallbera Guðný Gísladóttir kom Val yfir á KR-vellinum í upphafi síðari hálfleiks en Katrín Ásbjörnsdóttir jafnaði metin úr víti sem hún fiskaði sjálf. KR gat svo stolið sigrinum undir lokin en úrslitin 1-1.

Stjarnan vann Fylki 1-0 á heimavelli sínum í Garðabæ þar sem Katie McCoy skoraði sigurmarkið undir lok leiksins. Grindavík og Breiðablik gerðu markalaust jafntefli á Suðurnesjunum og þá vann Afturelding 1-0 sigur á Haukum með marki Sigríðar Þóru Birgisdóttur.

Smelltu hér til að sjá stöðuna í deildinni.