Hamilton og Alonso sáttir

Lewis Hamilton og Fernando Alonso eru búnir að ræða málin eftir nokkuð hvöss orðaskipti beggja eftir síðustu keppni. Alonso taldi Hamilton hafa sloppið létt frá dómurum eftir brot í brautinni, en Hamilton sagði hann súran vegna slaks árangurs.

"Við erum í sambandi. Hann er með mitt símanúmer og ég hans. Við sendum skeyti hvor á annan um daginn og allt er í góðu", sagði Hamilton í samtali við Reuters, samkvæmt frétt á autosport.com.

"Ég sendi honum skeyti til að sjá hvernig honum liði og hann sagði allt í sóma og hann vissi hvernig kappakstursheimurinn virkar og að þetta er erfitt ár."

Hamilton keppir á heimavelli um helgina á breyttri Silverstone braut. Þangað mun faðir hans Anthony mæta, en hann var áður umboðsmaður Hamiltons.

"Ég er búinn að bjóða allri fjölskyldunni og nánast allir mæta. Ég hef þroskast mikið á því að sjá um eigin mál og hafa stjórn á hlutunum", sagði Hamilton um hvernig það væri að vera án föður síns sem umboðsmanns.

"Ég er nokkuð stoltur af því að hafa stokkið á þetta. Ég hef beðið fólk að sýna þolinmæði á fundum og hef smám saman einbeitt mér að ákveðnum þáttum, sem ég skildi ekki áður og þurfti að læra á."