Ranieri vill fá Gallas til Rómar

Roma hefur áhuga á franska miðverðinum William Gallas hjá Arsenal. Samningur leikmannsins við enska félagið rennur út í sumar.

Claudio Ranieri, þjálfari Roma, keypti Gallas til Chelsea 2001 þar sem hann var fastamaður og lék bæði sem miðvörður og vinstri bakvörður.

„William hefur gert góða hluti hjá Chelsea og Arsenal. Allir toppleikmenn eru velkomnir til Roma," sagði Ranieri þegar hann var spurður út í málið á blaðamannafundi.

Rómverjar eiga stórleik annað kvöld þegar þeir leika gegn AC Milan. Roma er í þriðja sæti með 51 stig, þremur stigum á eftir Milan sem er í öðru sætinu.

Inter er á toppnum með 58 stig og sagði Ranieri á blaðamannafundinum að í sínum huga væri það bara formsatriði fyrir liðið að klára deildina.