Inter og Roma á höttunum eftir Simplicio

Umboðsmaður miðjumannsins Fabio Simplicio segir ekkert hæft í þeim sögusögnum um að skjólstæðingur sinn sé búinn að ná munnlegu samkomulagi við Roma um að ganga í raðir félagsins næsta sumar þegar samningur hans rennur út við Palermo.

Umboðsmaðurinn Gilmar Rinaldi viðurkennir þó að mörg félög séu á eftir hinum þrítuga Brasilíumanni.

„Fabio hafði möguleikann á að fara til Inter í síðasta mánuði en hann ákvað frekar að bíða fram á sumar með að ákveða framtíð sína í boltanum. Þá var Roma einnig að spyrjast fyrir um hann. Við sjáum til hvort að Inter og Roma hafi enn áhuga næsta sumar en það eru líka fleiri lið í spilinu," segir Rinaldi í viðtali við vefmiðilinn Romanews.eu.