Ísland hafði betur gegn Noregi

U-21 landslið Íslands í handbolta vann í kvöld sigur á Noregi, 29-27, í æfingaleik sem fór fram í íþróttahúsinu í Strandgötu í Hafnarfirði.

Norðmenn höfðu yfir í hálfleik, 12-11, en leikurinn var spennandi lengi vel. Íslendingar komust ekki yfir fyrr en í stöðunni 21-20 um miðjan síðari hálfleik og reyndust sterkari á lokasprettinum.

Heimir Óli Heimisson, Guðmundur Árni Ólafsson og Ragnar Jóhannsson skoruðu sex mörk hver fyrir Ísland og Ólafur Guðmundsson fjögur.

Liðin mætast næst á morgun á sama stað klukkan 17.00 og svo á Selfossi á mánudagskvöldið.