Kaup á skuldabréfi aldrei færð til bókar

Samnings um kaup gjaldeyrissjóðs Glitnis, GLB FX, á skuldabréfi af Saga Capital í ágúst 2008 er í engu getið í bókum eða fundargerðum sjóðsins frá þeim tíma. Reglum samkvæmt átti að færa alla gerninga sjóðsins í bækur hans í enda hvers dags, enda höfðu þeir alla jafna áhrif á afkomu sjóðsins, sem er uppreiknuð daglega. Í þessu tilviki var það ekki gert.

Þetta kveikti grunsemdir hjá rannsakendum viðskiptanna um að samningur­inn væri falsaður – hann hefði ekki verið gerður fyrr en eftir bankahrun – og var þeim grunsemdum komið áleiðis til embættis sérstaks saksóknara.

Tölvupóstsamskipti á milli Saga Capital og Fjármálaeftirlitsins frá 10. september 2008, þar sem vikið er að samningnum, sýna hins vegar að hann var gerður fyrir bankahrun. Sérstakur saksóknari hefur því ekki tekið meint skjalafals til rannsóknar, ólíkt því sem sagði í frétt Fréttablaðsins í gær. Hann rannsakar hins vegar aðra þætti málsins.

Saga Capital lánaði Stím hf. milljarð árið 2007 til kaupa á hlutabréfum í Glitni. Ári síðar, hinn 18. ágúst 2008, gerði Saga Capital samning við GLB FX um kaup á skuldabréfinu á fullu verði með vöxtum, samtals 1.167 milljónir. Samningurinn var framvirkur til 19. nóvember 2008, sem þýðir að kaupverðið var greitt þá. Engar skýringar hafa fengist á því hvers vegna ákveðið var að hafa samninginn framvirkan, en ganga ekki einfaldlega frá kaupunum strax.

Þegar samningurinn var gerður var virði bréfanna í Glitni orðið lítið sem ekkert, samkvæmt bókum Stíms, og því hefði Stím aldrei getað greitt skuldina. Það veldur rannsakendum því heilabrotum hvers vegna Glitnir kaus í raun að borga skuld Stíms við Saga Capital án þess að fá nokkuð í staðinn. Þar fyrir utan mátti sjóðurinn ekki reglum samkvæmt fjárfesta í skuldabréfum.

Forsvarsmenn Saga Capital hafa fullyrt að ábyrgðin á kaupunum hafi alfarið verið Glitnis. Meira að segja er tekið fram í samningnum um kaupin að Saga Capital viti ekki hvers virði skuldabréfið sé.

Þorvaldur Lúðvík Sigurjónsson, forstjóri Saga, hefur verið yfirheyrður vegna málsins hjá sérstökum saksóknara og kynnt þar réttar­staða sakbornings. Hann hefur þó sagt að rannsóknin beinist í engu að honum né Saga.

Samkvæmt gögnum sem Fréttablaðið hefur séð reyndi Saga Capital ítrekað að nálgast upplýsingar um starfsemi Stíms frá Glitni án árangurs. Þá hafi Saga reynt að skipta út stjórnarmanni bankans í Stími og fá félagið fært af heimilisfangi bankans, en án árangurs vegna þess að aldrei var boðað til aðalfundar í félaginu.

stigur@frettabladid.is