Skemmdu heimavöll Napoli nokkrum dögum fyrir Liverpool-leikinn

Vandræðaunglingar gerðu Napólímönnum grikk á sunnudaginn þegar sex strákar brutust inn á San Paolo leikvanginn og stórskemmdu leikvöllin. Napoli tekur á móti Liverpool á fimmtudaginn í Evrópudeildinni og vonast heimamenn til þess að hægt verði að spila á vellinum.

Unglingarnir brutust unn á völlinn í skjóli nætur, skemmdu bæði bæði mörkin og grófu að minnsta kosti 50 litlar holur hingað og þangað á vellinum. Einhverjir halda því fram að þetta skemmdaverk hafi verið framið í tilefni af komu Liverpool-liðsins og að tímasetningin hafi ekki verið tilviljun.

Starfsmenn vallarins hafa verið að fylla í holurnar og laga grasið síðan á mánudagsmorgun. Ítalska blaðið Gazzetta dello Sport segir að leikurinn muni fara fram á vellinum og að Liverpool-menn fái meira segja að æfa á grasinu annað kvöld.