Steingrímur segir ósanngjarnt að bera samningana saman

Steingrímur J. Sigfússon fjármálaráðherra er mjög ánægður með nýjan Icesave-samning og segir hann vera risaáfanga í endurreisn Íslands. Hann bendir á að allt aðrar aðstæður séu nú en þegar fyrri samningur var gerður í fyrrasumar og því sé ekki sanngjarnt að bera samningana saman.

Steingrímur var gestur í Morgunútvarpi Rásar 2 í morgun þar sem hann ræddi um Icesave-samninginn.

Formenn stjórnarflokkana hafa sætt gagnrýni eftir að ljóst var að nýi samningurinn er mun hagstæðari fyrir Íslendinga en sá fyrri. Sem kunnugt er var þeim samningi hafnað í þjóðaratkvæðagreiðslu. Að mati Steingríms er hins vegar ekki hægt að bera þessa samninga saman þar sem ólíkar forsendur liggja að baki þeim og staða Íslands í samningaferlinu betri nú.