Einstakur hljómur Apparats

Tónlist

Pólýfónía

Apparat Organ Quartet

Orgelkvartettinn Apparat var stofnaður árið 1999 og sendi frá sér sína fyrstu plötu samnefndri sveitinni árið 2002. Hún þótti afbragð og innihélt meðal annars lög eins og Cruise Control, Romantika og Stereo Rock & Roll sem hafa notið mikillar hylli tónlistaráhugamanna alla tíð síðan.

Apparatið efldist með árunum sem tónleikasveit og fyrir þremur árum fóru menn að tala um nýja plötu. Nú er hún loks komin. Og þvílík plata!

Pólýfónía er allt sem maður gat látið sig dreyma um að hún yrði. Apparat-hljómurinn er til staðar, Apparat-húmorinn og Apparat-stuðið, en tónlistin hefur líka þróast og er ennþá meira grípandi og skemmtileg. Pólýfónía er líka heilsteyptari en fyrri platan. Það er enginn dauður punktur á henni.

Tónlist Apparat Organ Quartet er eins og nafnið bendir til spiluð á orgel og hljóðgervla, aðallega gamlar sígildar græjur: hammonda, farfisur og ýmis smáhljómborð ætluð til heimabrúks. Auk þess er í sveitinni trommuleikari sem keyrir upp kraftinn og styrkir rokkþættina í tónlistinni.

Það er fullt af tónlistarmönnum starfandi í heiminum sem dýrka gamlar græjur, allt frá Air og Daft Punk yfir í Stereolab og Hjálma, en enginn þeirra hljómar eins og Apparatið. Það er einstakt. Samt er eitthvað augljóslega aðlaðandi við það að spila svona melódíska og marghljóma orgeltónlist og rokka hana upp, blanda saman því besta frá Kraftwerk og keyrslurokki. En til þess að það virki þarf að gera það vel. Og strákarnir í Apparatinu virðast vera um það bil þeir einu sem ráða við það. Og taka sér tímann sem þarf.

Eins og á fyrri plötunni eru þýsku ofurmennin í Kraftwerk augljósasti áhrifavaldurinn á Pólýfóníu. En ýmsir aðrir listamenn hafa áhrif í einstaka lögum. Í Stereo Rock & Roll á fyrri plötunni var hreinræktaður Gary Glitter Band-taktur, en á nýju plötunni má t.d. heyra progg­legar slaufur bæði í Pentatronik og Síríus Alfa. Lögin eru flest bæði grúví og dans­hvetjandi, nema kannski lokalagið Söngur geimunglingsins sem er stórt og kaflaskipt til að róa menn aðeins eftir allt stuðið. Textarnir eru einfaldir og skemmtilegir. Þeir eru flestir sungnir með hljóðgervla­rödd á ensku, íslensku, þýsku og japönsku.

Í einu orði sagt snilldar­plata!

Niðurstaða: Orgelkvartettinn Apparat keyrir upp stuðið með frábærri plötu.