Ragna í fyrsta sinn í átta liða úrslit á Grand Prix móti

Ragna Ingólfsdóttir komst í átta manna úrslit á opna hollenska mótinu í badminton eftir sigur á búlgörsku stelpunni Lindu Zechiri í oddahrinu. Þetta er í fysta sinn sem Ragna kemst í átta liða úrslit á Grand Prix móti.

Ragna vann fyrstu lotuna 21-19 en tapaði þeirri annarri 21-14. Í oddalotunni komst Ragna í 11-5 og vann að lokum öruggan sigur 21-10.

Samkvæmt nýjum heimslista, sem var birtur í dag, er Ragna númer 101 en Zechiri númer 31. Það var því glæsilegur árangur hjá Rögnu að vinna þá búlgörsku. Ragna spilar í átta manna úrslitum á morgun annað hvort gegn Elena Prus frá Úkraínu eða Olgu Konon frá Þýskalandi.