Valdimar: Höfðum óbilandi trú á þessu

Valsmaðurinn Valdimar Fannar Þórsson var að vinna sinn fyrsta bikarmeistaratitil í dag en hann hafði komið tvisvar áður í Höllina og þurft að sætta sig við tap.

"Ég er enn að átta mig á þessu. Valsliðið sýndi gríðarlegan karakter hér í dag. Það höfðu allir trú á þessu þó svo við hefðum byrjað leikinn illa og verið að elta. Við höfðum óbilandi trú á því að við myndum vinna," sagði Valdimar kátur en hvað fannst honum um markvörsluna hjá Hlyni undir lokin?

"Hún var ótrúleg. Þarna komu öll 35 eða 36 árin vel í ljós. Ef einhver átti skilið að vinna þennan leik þá var það hann," sagði Valdimar en hann var búinn að koma gullmedalíunni yfir á son sinn.