Þjálfari Orlando líkir David Stern við einræðisherra

Stan Van Gundy þjálfari NBA liðsins Orlando Magic gerir eitt mjög vel – að tala, og nú hefur hinn litríki þjálfari reitt David Stern framkvæmdastjóra NBA deildarinnar til reiði. Enda ekki á hverjum degi sem Stern er líkt við einræðisherra.

Gundy er ekki sáttur við þá meðferð sem miðherjinn Dwight Howard fær hjá dómurum deildarinnar. Gundy hefur nú gengið enn lengra í gagnrýni sinni á Stern og líkir hann stjórnunaraðferðum hans við það sem þekkist í einræðisríkjum.

„Þetta kerfi sem við búum við er það sem David Stern og hans lærisveinar hafa skapað. Ég má ekki hafa skoðun á því, og ég get ekki gagnrýnt þetta kerfi. David Stern þolir ekki að aðrir hafi skoðun og láti þær í ljós – líkt og margir leiðtogar heimsins. Málfrelsið er ekki til staðar," sagði Gundy en hann var sektaður um 35.000 bandaríkjadali í janúar fyrir að lýsa óánægju sinni með dómara.

Stern mun eflaust bregðast hart við þessum orðum Gundy og ætlar framkvæmdastjórinn að ræða málið við eigendur Orlando Magic.