Óttinn eykur eftirspurn eftir dómsdagsíbúðum

Óttinn er orðinn að miklum viðskiptatækifærum í Bandaríkjunum. Þeir sem framleiða svokallaðar dómsdagsíbúðir anna ekki eftirspurn eftir þeim þessa dagana.

Fjallað er um málið á viðskiptavefnum e24.no þar sem vitnað er í CNN Money. Þar er sagt frá Terra Vivios sem framleiðir sprengjuhelda íverustaði fyrir allt að 200 manns í einu. Á vefsíðu fyrirtækisins er því lofað að þessir íverustaðir, eða sprengjuherbergi, veiti vernd gegn kjarnorkustríði, eiturefnastríði, hryðjuverkum, anarkisma, rafrænum árásum, sólstormum, flóðbylgjum og eldgosum.

Eftir að uppreisnir hófust fyrir botni Miðjarðarhafsins og jarðskjálfti og flóðbylgja léku Japani grátt hefur eftirspurnin eftir plássi í dómsdagsíbúðum Terra Vivios aukist um 1000%. Aðrir framleiðendur upplifa einnig verulega aukningu hjá sér. Sem dæmi má nefna að UndergroundBombShelter.com segir að eftirspurnin hafi aukist um 400% eftir sprengjuheldum herbergjum sem þeir framleiða og Northwest Shelter Systems segist þegar hafa selt 12 eintök af sinni útgáfu af sprengjuheldum íverustöðum.