Tveir milljarðar manna munu horfa á brúðkaupið

Búist er við því að tveir milljarðar manna um allan heim muni verða límdir við sjónvarpsskjái eftir þrjár vikur þegar Vilhjálmur Bretaprins og Kate Middleton ganga í það heilaga. Þá er talið að um 500 þúsund manns muni flykkjast út á götur Lundúnaborgar til að berja prinsinn og brúði hans augum.

Starfsmenn konungshirðarinnar létu breska blaðinu The Sun í té upplýsingar um skipulagið fyrir brúðkaupið í gær. Að morgni brúðkaupsdagsins mun Elísabet önnur Bretadrottning tilkynna hvaða titla parið mun bera eftir brúðkaupið. The Sun segir að vangaveltur séu um hvort þau verði kölluð hertoginn og hertogaynjan af Cambridge.