Hallbera skaut Valskonum í úrslitaleikinn

Hallbera Guðný Gísladóttir tryggði Val 2-1 sigur á Breiðabliki í undanúrslitaleik Lengjubikars kvenna á gervigrasinu á Hlíðarenda í kvöld en Valsliðið mætir annaðhvort Þór/KA eða Stjörnunni í úrslitaleiknum á sunnudaginn. Valur hefur titil að verja eftir að hafa unnið Fylki í úrslitaleiknum í fyrra.

Leikur Þórs/KA og Stjörnunnar átti að fara fram í Boganum í kvöld en honum var frestað um sólarhring þar sem Stjörnuliðið komst ekki norður vegna veðurs.

Rakel Logadóttir kom Val í 1-0 en Þórdís Hrönn Sigfúsdóttir jafnaði metin fyrir Breiðablik. Hallbera skoraði síðan sigurmark Vals úr vítaspyrnu. Upplýsingar um markaskorara eru fengnar af fótbolti.net.