Stjarnan og Valur unnu góða sigra - langþráður sigur Aftureldingar

Stjarnan og Valur, toppliðin í Pepsi-deild kvenna, unnu bæði leiki sína á útivelli í kvöld og halda Stjörnukonur því áfram tveggja stiga forskoti á Val á toppnum. Stjarnan vann 4-1 sigur á Fylki í Árbænum þar sem fyrirliðinn Gunnhildur Yrsa Jónsdóttir skoraði þrennu og Valur vann 6-0 sigur í Grindavík. Afturelding vann 3-0 sigur á KR í þriðja leik kvöldsins og hoppaði með því upp í sjöunda sæti.

Gunnhildur Yrsa Jónsdóttir kom Stjörnunni yfir strax á fjórðu mínútu með skalla eftir hornspyrnu Soffíu Gunnarsdóttur og ellefu mínútum síðar skoraði Gunnhildur aftur eftir stoðsendingu frá Soffíu. Ashley Bares skoraði síðan þriðja markið tveimur mínútum síðar og Stjarnan var því komið í 3-0 eftir aðeins 17 mínútna leik. Gunnhildur innsiglaði þrennu sína 17 mínútur fyrir leikslok með skalla eftir hornspyrnu frá Ingu Birnu Friðjónsdóttur áður en Anna Björg Björnsdóttir minnkaði muninn.

Valskonur komust aftur á sigurbraut með 6-0 stórsigri á botnliði Grindavíkur. Dagný Brynjarsdóttir opnaði markareikninginn eftir hálftíma leik og í framhaldinu skoraði Valsliðið þrjú mörk til viðbótar á næstu tíu mínútum. Eftir það voru úrslitin löngu ráðin en Valsliðið bætti við tveimur mörkum í seinni hálfleik. Kristín Ýr Bjarnadóttir skoraði tvö marka Vals.

Afturelding sótti þrjú stig á KR-völlinn og vann þar sinn fyrsta deildarsigur síðan í maímánuði. Afturelding komst líka fyrir upp fyrir KR og upp í 7. sætið með þessum 3-0 sigri. Marcia Rosa Silva skoraði fyrsta markið og nýju stelpurnar í Mosfellsbænum, Anna Garðarsdóttir (beint úr aukaspyrnu) og Íris Dóra Snorradóttir skoruðu báðar í sínum fyrsta leik með liðinu.

Úrslit og markaskorarar í Pepsi-deild kvenna í kvöld:

Fylkir-Stjarnan 1-4

0-1 Gunnhildur Yrsa Jónsdóttir (4.), 0-2 Gunnhildur Yrsa Jónsdóttir (15.) 0-3 Ashley Bares (17.), 0-4 Gunnhildur Yrsa Jónsdóttir (73.), 1-4 Anna Björg Björnsdóttir (78.)

Grindavík-Valur 0-6

0-1 Dagný Brynjarsdóttir (30.), 0-2 Thelma Björk Einarsdóttir (33.), 0-3 Kristín Ýr Bjarnadóttir (37.), 0-4 Caitlin Miskel (39.), 0-5 Rakel Logadóttir (54.), 0-6 Kristín Ýr Bjarnadóttir (67.)

KR-Afturelding 0-3

0-1 Marcia Rosa Silva (18.), 0-2 Anna Garðarsdóttir (26.), 0-3 Íris Dóra Snorradóttir (54.)



Upplýsingar um markaskorara eru fengnar af vefsíðunni fótbolti.net