Vopnaðir lög­reglu­menn hand­tóku þrjá menn á Hring­braut

Þrír menn voru handteknir á gatnamótum Njarðargötu og Hringbrautar nú fyrir stundu en talið er að þeir tengist vopnuðu ráni sem var framið í Michelsen úraverslun í morgun.

Varðstjóri hjá lögreglunni vildi þó ekki staðfesta að mennirnir séu þeir sem frömdu ránið - rannsókn sé í enn í fullum gangi.

Sérsveit ríkislögreglustjóra aðstoðar við aðgerðir lögreglunnar.

Samkvæmt upplýsingum fréttastofu handtóku vopnaðir lögreglumenn þrjá menn sem voru á vínrauðri Mitsubishi bifreið á umferðarljósum á götunni.

Þrír menn réðust inn í úraverslunina um klukkan hálf ellefu í morgun. Mennirnir voru allir vopnaðir byssum og bareflum en bifreið sem þeir notuðu við verkið fannst stuttu síðar í Þingholtunum og voru þrjár leikfangabyssur í henni.

Samkvæmt heimildum fréttastofu var bifreiðinni stolið í gærkvöldi í Gnoðarvogi og lögregla auglýsti eftir henni í morgun. Það er dökkblá Audi bifreið.

Varðstjóri hjá lögreglunni sagði við fréttastofu í morgun að talið sé að mennirnir séu erlendir ríkisborgarar.