Gefur lítið fyrir gagnrýni Steve Jobs

Bill Gates, einn af stofnendum Microsoft, gefur lítið fyrir gagnrýni Steve Jobs í nýlegri ævisögu sem varpar ljósi á samstarf og samkeppni Gates og Jobs. Ævisagan var gefin út stuttu eftir að Jobs lést.

Í viðtali sagði Gates að gagnrýnin angri hann ekki vitund.

Í ævisögunni, sem einfaldlega heitir „Steve Jobs" og er skrifuð af Walter Isaacson, segir Jobs að Gates sé hugmyndasnauður og hafi ekki uppgötvað skapan hlut. Jobs telur að gamli vinur sinn og samstarfsfélagi eigi betur heima í hjálparstarfsemi en tækniþróun.

Gates sagði að samstarf þeirra hafi oft á tíðum verið erfitt og að Jobs hafi bæði sagt góða hluti um hann og slæma. Hann telur að þeir hafi hvatt hvor annan áfram.

Gates telur að reiði Jobs í sinn garð sé hugsanlega vegna þeirra erfiðleika sem Apple gekk í gegnum áður en fyrirtækið varð stærsta tæknifyrirtæki veraldar.